سب مایا ہے

کہتے ہیں کہ کتے کی دم اگر سو سال بھی نلکی میں رکھی جائے تو پھر بھی وہ ٹیڑھی ہی رہتی ہے۔ اس محاورے کی حقیقت تک پہنچنے کی نہ ہم میں ہمت ہے اور نہ وقت کہ تجربہ کربیٹھیں لیکن اس مختصر سی زندگی میں بھی حالات و واقعات کو دیکھنے کے بعد اس محاورے کی حقیقت پر ایمان لانے کو دل کرتا ہے۔ ایک زمانہ تھا کہ جب تعلیمی ادارے الحاد کا گڑھ ہوا کرتے تھے اور کمیونزم کے سرخ پھریرے کے سائے تلے عقابوں کے روپ میں گدھ عوام الناس کے لیے ایک نیا ضابطہ اخلاق مقرر کررہے تھے اسلامی جمعیت طلبہ ان کے مقابل استقامت کے ساتھ کھڑی ہر محاذ پر انہیں بچھاڑ رہی تھی۔ 85 سے پہلے کا دور جب طلبہ یونین موجود تھی یقیناً ان اباحیت پسندوں کےلیے جو آج کل بے غیرت بریگیڈ کے عنوان سے جانے پہچانے ہیں کسی بھیانک خواب سے کم نہیں ہوگا۔ آج بھی یہ جب اس کی کسک محسوس کرتے ہیں تو بوکھلا جاتے ہیں۔ یہی وجہ ہے کہ یہ اپنی خفت کو مٹانے اور اپنی ناکامی کو چھپانے کے لیے بھونڈے الزامات کا سہارا لیتے ہیں۔

جمعیت پر لگائے جانے والے انتہائی خطرناک الزامات میں سے ایک یہ بھی ہے کہ جمعیت اختلاط مردو زن کو حدود کے اندر ہی برداشت کرتی ہے۔ پچھلے دنوں خبر آئی کہ پنجاب کے ایک تعلیمی ادارے میں موزک کانسرٹ کے دوران بھگدڑ مچنے سے کئی طالبات ہلاک ہوگئیں۔ تو دل میں ایک خیال آیا کہ اگر جمعیت اس ادارے میں ہوتی تو شاید یہ لڑکیاں زندہ ہوتیں۔ میرے اس بیان پر بیغیرت بریگیڈ کا سیخ پا ہونا بجا ہے کہ اس بریگیڈ کا سب سے بڑا مسئلہ لہو و لہب پر مبنی مخلوط کلچر کا نفاذ ہی ہے کہ اس کے لیے کینیڈا یا امریکہ جانے کی ضرورت نہ پڑے یہی کسی پارک میں لوئر مڈل کلاس بچوں کی طرح بلاخوف و خطر پونڈی کی جاسکے۔ پارک کے ذکر سے مایا خان یاد آگئیں جو پچھلے کئی دنوں سے بہت مشہور ہیں خاص کر سوشل نیٹ ورکس میں۔ محترمہ اپنے مارننگ شو میں مصالحہ لگانے کے لیے کراچی کے ایک پارک میں پہنچ گئیں اور صبح صبح پریم کبوتروں کو حراساں کرنے لگیں۔ اس کے بعد تو لگتا ہے ایک طوفان آگیا ہے۔ ہرکوئی اپنی بساط کے مطابق اس بہتی گنگا میں ہاتھ دھورہا ہے کیا ہاتھ دھوکر پیچھے پڑگیا ہے۔ اور اس میں پیش پیش وہی بریگیڈ ہے۔ ہر طرف میڈیا کی اخلاقیات کا رونا رویا جارہا ہے۔ اصول و ضوابط کے فقدان کا ماتم ہے اور پرائیویسی میں مداخلت کا واویلا۔

نہ جانے یہ اخلاقیات اور پرائیویسی وغیرہ اس وقت کہاں چلی جاتی ہے جب کوئی رپورٹر اپنے پاس موجود کیمرے کے زعم میں کسی مدرسے میں کسی مولوی کی پرائیویسی کو پامال کرتا ہے؟ لاپتہ افراد کی بازیابی کے لیے کوشش مفقود ہے اور جھوٹی گھڑی گئی کہانیوں میں طالبان کے ظلم کا شکار جعلی کرداروں کے لیے خوب آہ و زاری ہے۔ معاشرے میں اخلاقی اقدار کے تحفظ پر گالیاں اور طنز کے نشتر ہیں اور امریکی سفارت خانے کی ہم جنس پرستی کے فروغ کے لیے کوششوں پر ستائش۔ ان کی منافقت کا اندازہ اس سے لگایا جاسکتا ہے کہ جب سے مایا خان کا موضوع گرم ہے ٹھیک اسی وقت سے پنجاب کے اسپتالوں میں جعلی ادویات سے ہونے والی ہلاکتیں 100 سے اوپر پہنچ گئیں ہیں اور یہ سول سوسائٹی کے ٹھیکدار مایا خان کا دکھڑا لیے بیٹھے ہیں۔ آج کے روشن خیال اور کل کے سُرخوں کی حرکتوں کو دیکھ کر کُتے کی دم یاد آہی جاتی ہے۔

صاحبو! ان تمام باتوں کے بیچ ایک اور بات میرے ذہن میں تھی کہ شکر ہے اس آنٹی بریگیڈ میں کسی نے اسکارف نہیں پہنا تھا ورنہ جماعتی ہونے کا الزام پکا تھا لیکن پھر یہ انکشاف بھی ہوا کہ صاحب یہ تو دراصل جماعتی سوچ ہے جو کہ ضیاءالحق سے ورثے میں ملی ہے۔ ایسا لگتا ہے کہ ضیاء الحق کا بھوت اب بھی انکا پیچھا کررہا ہے۔ یہ اس کے خوف سے باہر نہیں آئے اب تک۔ ساتھ ہی جمعیت کا جامعہ کراچی سے نکالے جانے کی پرامید خبریں دیتے نہیں تھکتے کہ کیسے اے پی ایم ایس او نے انہیں جامعہ سے نکال باہر کیا ہے۔ جمعیت کی طلبہ کی مشکلات میں کمی اور انکی آواز ارباب اختیار تک پہنچانا، پوانٹ بسوں کے لیے تحریک، فیسوں میں اضافہ کے خلاف تحریک، اسٹڈی مٹیرل تک رسائی کو آسان بنانا۔ نئے آنے والے طلبہ کی مدد و رہنمائی، غیرنصابی سرگرمیوں کی حوصلہ افزائی وغیرہ، ان تمام سرگرمیوں کے الرغم انہیں یہ خوف لاحق رہتا ہے کہ کہیں اسکارف نہ پہنا پڑجائے یا اوباشوں کی طرح گھٹیا حرکتیں کرنے کا اختیار نہ سلب کرلیا جائے۔ انکا ایک ہی نعرہ ہے اور جمعیت سے بغض پرانا ہے، اس بارے کیا کہیں وہی کتے کی دم والا محاورا۔۔۔ بقول شاعر۔۔۔

شاہیں تیری پرواز سے جلتا ہے زمانہ

تو اپنے پروں سے اسے اور ہوا دے

1985 میں جب تعلیمی اداروں میں آخری یونین کے انتخابات ہوئے تو جامعہ کراچی میں اسلامی جمعیت طلبہ نے کلین سوئیپ کیا جو اس پر طلبہ و طالبات کے اعتماد کا مظہر ہے۔ اس اعتماد کی جھلک نیچے ویڈیو کلپ میں لاحظہ کیجیے۔

http://www.youtube.com/watch?feature=player_embedded&v=ibn24fPJgH0

ساتھ ہی سابق شیخ الجامعہ ڈاکٹر جمیل جالبی کے جمعیت کے بارے میں فرمودات بھی سننے لائق ہیں۔

http://www.youtube.com/watch?v=BRp3oMEEX3w

جامعہ کراچی میں جمعیت کی موجودہ آب و تاب دیکھنے کے لیے جامعہ کا ایک چکر سودمند ثابت ہوسکتا ہے۔ ہم تو یہی کہیں گے کہ اس طرح کے جاہلانہ پروپگینڈے سے جمعیت کا راستہ کھوٹہ نہیں کیا جاسکتا کہ

ان چراغوں کو تو جلنا ہے ہوا جیسی ہو۔۔۔