بوڑھی گنگا کے کنارے۔۔۔۔

مئی 2009 میں جب یہاں کراچی میں گرمی اپنے جوبن پر تھی مجھے ڈھاکہ چلنے کی پیشکش ہوئی۔ ڈھاکہ جو کبھی اپنا شہر تھا،  سابق مشرقی پاکستان اور اب بنگلہ دیش کا دارالحکومت۔   ہوا کچھ یوں کہ ہمارے دوست عبدالرحمٰن کی شادی ڈھاکہ میں سکونت پذیر ان کے چچا کی بیٹی سے طے پاگئی تھی اور وہ فی الحال نکاح  کے غرض سے ڈھاکہ جارہے تھے اور بضد تھے کہ آپ بھی ساتھ چلیں۔  وہ چونکہ واقفان حال میں سے تھے لہذا ساتھ ہی ساتھ سفری فنڈ میں حصہ ڈالنے  کی پیشکش بھی کرگئے۔ اب اندھا کیا چاہے دو آنکھیں کے مصداق ہم نے فورا ہامی بھرلی اور ساتھ ہی اس راہ میں آنے والی مشکلات سے نمٹنے کی تیاری کرنے لگے۔ سب سے پہلی مشکل تو گھر والوں سے اجازت اور فنڈز کا انتظام تھا جو خوش اسلوبی سے طے پا گیا۔ دوسری اہم مشکل دفتر سے ایک ماہ کی چھٹی تھی۔ بڑی مشکل سے پندرہ دنوں کی چھٹی ملی۔ بس پھر کیا تھا ہم فورا ڈھاکہ جانے کے لیے تیاریوں میں مصروف ہوگئے۔

20 مئی کی شام کو ہم ڈھاکہ میں تھے۔ میں کہیں پڑھا تھا کہ شیخ مجیب الرحمٰن نے لکھا تھا کہ جب میں اسلام آباد آیا تو اسلام آباد کی شان اور خوبصورتی کو دیکھ کر دنگ رہ گیا۔ خوبصورت عمارتیں اور کشادہ سڑکیں ، میرا دل چاہا کہ میں اس مٹی کو چوم لوں اور جب میں اسے چومنے کے لیے اسلام آباد کی ایک سڑک پہ جھکا تو مجھے اسلام آباد کی سڑکوں سے مشرقی پاکستان کے پٹ سن کی خوشبو آئی۔ اب میرا خیال تھا کہ ہم سے آزادی کے بعد بنگلہ دیش شاید ایک فلاحی ریاست بن چکا ہوگا۔ کیونکہ اب  پٹ سن سے حاصل ہونے والا زرمبادلہ بنگلہ دیش واسیوں پر ہی خرچ ہورہا ہوگا۔ تعلیم اور صحت کی سہولتوں سے ہر بنگالی آسانی سے استفادہ کررہا ہوگا۔ غربت مک گئی ہوگی۔ روزگار کی فراوانی ہوگی۔ بہترین انفرا اسٹرکچر تعمیر ہو چکا ہوگا۔ لیکن وہاں پہنچنے کے بعد یہ سارے خواب چکنا چور ہوگئے۔ کہ وہاں بھی 'دن پھرے ہیں فقط وزیروں کے' اور 'پائوں ننگے ہیں بینظیروں کے'۔

شروع کے چار پانچ دن تو شادی کے ہنگاموں میں ہی گذر گئے اور اس دوران بنگالی کلچر کو قریب سے دیکھنے کا موقع ملا۔ جب بوریت زیادہ ہونے لگتی تو آس پاس کے علاقوں کی سیر کو نکل جاتے ۔ ہماری رہائش گاہ سے کچھ ہی دور ایک عارضی کیمپ ہے جو پچھلے 30 سالوں سے قائم ہے۔ یہ محصورین کا ایک کیمپ ہے جہاں غیر بنگالی [بہاری] قیام بنگلہ دیش کے فورا بعد سے ہی محصور ہیں۔ ان کا جرم  بنگلہ دیش کے قیام کی مخالفت اور مادر وطن کو دوٹکڑے ہونے سے بچانے کے لیے جدوجہد کرنا ہے۔ بنگلہ دیش کی تحریک کے دوران اور بعد میں تقریبا دس لاکھ سے زائد غیر بنگالیوں کا قتل عام کیا گیا۔ ان کی املاک لوٹ لی گئیں۔ ان کی عورتوں کی عصمت دری کی گئی اور انہیں ان کیمپوں میں محصور کردیا گیا۔ ان کیمپوں میں ان کی تیسری نسل پاکستان آنے کے انتظار میں پروان چڑھ رہی ہے۔  ہر قسم کی بنیادی سہولیات سے محروم ان کیمپوں کے حالات دیکھ کر دل خون کے آنسو روتا ہے۔

ایک دن یونہی سیر کے دوران ایک مسجد میں شیبر کے کچھ ساتھیوں سے ملاقات ہوئی۔  اسلامی چھاترا شیبر بنگلہ دیش کی معروف طلبہ تنظیم ہے۔ 16 دسمبر 1971 سے پہلے یہ اسلامی چھاترا شنگھو [اسلامی جمعیت طلبہ]  کے نام سے معروف تھی۔ سقوط ڈھاکہ کہ بعد اس پر مکتی باہنی سے مقابلے اور مادر وطن کو متحد رکھنے  کے لیے البدر نامی تنظیم قائم کرنے پر غداری کا الزام لگا کر پابندی عائد کردی گئی ۔ اس کے کارکنوں کو چن چن کر شہید اور پابند سلال کیا گیا ۔ 18 ستمبر 1979 کو اس تنظیم نے اسلامی چھاترا شیبر کے نام سے اپنی سرگرمیوں کا دوبارا آغاز کیا جس کا مطلب ہے اسلامی کیمپ برائے طلبہ یا اسلامک اسٹوڈینٹس کیمپ۔ آج یہ بنگلہ دیش کی سب سے بڑی اور اثر انگیز طلبہ تنظیم ہے۔

ان بنگالی دوستوں سے جب کبھی ملاقات ہوتی ہم پاکستان اور بنگلہ دیش کے حالات پر باتیں کرتے۔ اسلامی تحریک کی اثر انگیزی اور پیشرفت پر تبادلہ خیال کرتے۔ ایک دن شیبر کے ساتھیوں کی رہنمائی میں ہم نے دریائے بوڑھی گنگا کی سیر کا پروگرام بنایا۔ اور اگلے دن عصر کی نماز کے بعد ہم بوڑھی گنگا کے کنارے موجود تھے۔ یہاں آنے سے پہلے میں اکثر سوچا کرتا تھا کہ دریائے گنگا بنگلہ دیش میں داخل ہونے کے بعد بوڑھی کیوں ہوجاتی ہے؟ اور پھر خود ہی اس بارے میں ایک مفروضہ قائم کرلیا کہ شاید ہمالیہ کے پہاڑوں سے نکل کر ہندوستانی ریاستوں اتراکھنڈ ، اترپردیش، بہار، جھاڑکھنڈاور مغربی بنگال سے ہوتی ہوئی ہزاروں کلومیٹر کا فاصلہ طے کرکے جب دریائے گنگا بنگلہ دیش میں داخل ہوتی ہے تو بوڑھی ہوجاتی ہے۔ لیکن یہ مفروضہ یہاں آکر غلط ثابت ہوگیا۔

[nggallery id=1]

یہاں اس کے بارے میں ایک داستان مشہور ہے۔ کہتے ہیں کہ کسی زمانے میں بوڑھی گنگا دریائے گنگا کے دریائی نظام کا حصہ تھی۔ لیکن صدیوں پہلے یہ دریائے دھلشواری کے ذریعے ایک نئی جگہ سے بہتا ہوا خلیج بنگال میں گرنے لگا۔ پھر آہستہ آہستہ یہ دریائے گنگا اور دھلشواری سے اس قدر دور ہوتا گیا کہ اسے ایک نیا نام دینے کی ضرورت پیش آئی، لہذا اس کا نام بوڑھی گنگا پڑگیا۔ بنگالی لہجے میں اسے بوڑی گونگا کہتے ہیں۔ اس دریا کی ایک خاص بات اس میں سمندر کی طرح مدوجزر[ٹائیڈ] کا آنا ہے۔یہ 30 سال پہلے بیتے خونی واقعات کیا شاہد بھی ہے کہ جب اپنے ہی دشمن کے ہاتھ کٹھ پتلی بن کر کھیلنے لگیں اور نااہل حکمران اور غداران وطن قوم میں زبان، رنگ و نسل کی بنیاد پر تفریق پیدا کرنے لگیں تو کیسے کیسے المیے جنم لیتے ہیں۔

ہمارا بچپن پٹنہ، جمشید پور اور ڈھاکہ کے نواح میں بہنے والے دریائوں اور ندیوں کے قصے، کہانیاں سنتے گذرا لیکن آج میں یہاں ان سب قصوں کو بھلائے بوڑھی گنگا کے کنارے کھڑا ہوں۔ دریاء کی طرف سے آنے والی ٹھنڈی ہوا میرے بالوں کو بڑی محبت سے سہلا رہی ہے اور میں اس میں ماں کے پیار کا لمس محسوس کررہا ہوں۔ نہ جانے کیوں مجھے ماحول میں ہر طرف سوگواریت سی محسوس ہورہی ہے۔ یہ کبھی اپنا وطن تھا جس کے گلی کوچوں میں ہمارے والدین نے اپنا بچپن و جوانی گذارا۔ لیکن آج مجھے یہاں آنے کے لیے ویزے کی ضرورت پڑی ہے۔ دریاء کا پانی سبک رفتاری کے ساتھ بہتا چلا جارہا ہے۔ ایسا لگ رہا ہے کہ بوڑھی گنگا خاموشی کی زبان میں مجھ سے باتیں کررہی ہے۔ وہ مجھ سے پوچھ رہی ہے کہ کیسے آئے ہو؟ کیوں آئے ہو؟ میں نے کہا ٹوٹے ہوئے رشتوں کی تجدید کے لیے اسے دوبارہ استوار کرنے کے لیے آیا ہوں۔ اور پھر فیض کی وہ نظم پڑھ ڈالی جسے بنگلہ دیش جانے والے اکثر نام نہاد دانشور ہر مجمعے میں پڑھ ڈالتے ہیں:

ہم کے ٹھرے اجنبی اتنی ملاقاتوں کے بعد
اب بنیں گے آشنا کتنی مداراتوں کے بعد
کب نظر آئے گی بے داغ سبزے کی بہار
خون کے دھبے دھلیں گے کتنی برساتوں کے بعد

کیا ایسا ممکن ہے؟ کیا ہم دوبارہ ایک ہوسکتے ہیں؟ کیا تمام گلے شکوے دور ہوسکتے ہیں؟ کیا خون کے دھبے واقعی دھل سکتے ہیں؟ مجھے لگا کہ بوڑھی گنگا مسکرا رہی ہے، اور شاید فیض ہی کی نظم گنگنارہی ہے:

موتی ہو کہ شیشہ، جام کہ دُر
جو ٹوٹ گیا، سو ٹوٹ گیا
کب اشکوں سے جڑ سکتا ہے
جو ٹوٹ گیا ، سو چھوٹ گیا

...

یہ ساغر، شیشے، لعل و گہر
سالم ہوں تو قیمت پاتے ہیں
یوں ٹکڑے ٹکڑے ہوں، تو فقط
چبھتے ہیں، لہو رُلواتے ہیں

...

تم ناحق ٹکڑے چن چن کر
دامن میں چھپائے بیٹھے ہو
شیشوں کا مسیحا کوئی نہیں
کیا آس لگائے بیٹھے ہو

ماحول کا بوجھل پن کچھ اور بڑھ گیا ہے۔ مجھے جنرل مانیک شا کی آواز گونجتی ہوئی محسوس ہوئی جسے سن کر میرا خون کھولنے لگتا ہے۔ اندرا گاندھی کہتی ہے  کہ ہم نے دو قومی نظریہ خلیج بنگال میں ڈبودیا ہے۔اف میں نے اپنا سر پکڑ لیا، یہ آج مجھے یاسیت نے کیوں گھیر رکھا ہے؟ میں نے اپنے دوستوں کی طرف دیکھا وہ آپس میں خوش گپیوں میں مصروف تھے۔ میں نے سوچا کہ میں یہاں تفریح کے لیے آیا ہوں اور پھر میں ان افسوسناک خیالات پیچھا چھڑا نے کی کوشش کرنے لگا۔ اچانک مجھے اپنے قریب کسی کی موجودگی کا احساس ہوا۔ دیکھا تو شوکت اسلام کھڑا تھا۔ میں نے ڈبڈبائی ہوئی آنکھوں سے اس سے سوال کیا، کیا واقعی دوقومی نظریہ خلیج بنگال میں غرق ہوگیا؟ شوکت اسلام اردو سمجھ جاتا ہے لیکن بول نہیں سکتا۔ اس نے کچھ کہنے کے بجائے ایک آواز کی طرف متوجہ کیا۔ قریب ہی کسی مسجد سے مغرب کی آذان کی صدا بلند ہورہی ہے۔ موذن انتہائی پرسوز آواز میں پکار رہا تھا۔

"میں گواہی دیتا ہوں کہ اللہ کے سوا کوئی معبود نہیں" اور میں مسلمان ہوں۔

"میں گواہی دیتا ہوں کہ محمد صلی اللہ علیہ وسلم اللہ کے رسول ہیں"  اور میں مسلمان ہوں۔

سورج دور مغربی افق میں غروب ہورہا ہے۔ میں نے ایک الوداعی نظر بوڑھی گنگا پر ڈالی۔ الوداع بوڑھی گنگا الوداع۔ زندگی رہی تو پھر آئونگا۔۔۔۔۔۔