روشن خیالیے

آج کل ہر طرف دو چیزوں کا خوب چرچا ہے۔ ایک توہین رسالت کا قانون اوردوسرا ریفامڈ جی ایس ٹی۔ ہماری سیاسی جماعتیں تو آر جی ایس ٹی کے معاملے میں بیغیرتی کی حد تک جوڑ توڑ میں لگی ہیں لیکن بھونچال تو شاید توہین رسالت کے قانون پر آیا ہوا ہے۔ بھانت بھانت کی بولیاں، ختم کردو، تبدیل کرو، ظالمانہ قانون ہے۔ دین کے ٹھیکداروں کا کارنامہ ہے وغیرہ وغیرہ۔ انہیں صرف ان 700 افراد کا خیال آرہا ہے جن پر اس قانون کے بننے کے بعد سے اب تک مقدمات قائم کیے گیے۔  ان سات سومیں سے آدھے سے زیادہ افراد مسلمان ہی ہیں لیکن اس کے باوجود انہیں صرف عیسائیوں کا غم کھائے جارہا ہے۔ جی بڑے ہی مظلوم ہیں، پسے ہوئے طبقات سے ان کا تعلق ہے۔ کوئی حقوق میسر نہیں ہیں، بڑا ظلم ہوتا ہے جی ان کے ساتھ۔ باقی اٹھارہ کروڑ پاک لوگاں کو تو ہر طرح کی سہولتیں میسر ہیں۔ گاوّں دیہاتوںمیں وہ اپنے زمیندار کے برابر ہی بیٹھتے ہیں۔ راوی چین ہی چین لکھتا ہے جی ادھر۔

یارلوگ کہتے ہیں کہ یہ کیسا ظالمانہ قانون ہے کہ دو آپس میں لڑتے افراد اس کا شکار ہوجاتے ہیں۔ مزے کی بات یہ کہ جہاں بیٹھ کر یہ اس طرح کی باتاں کرتے ہیں وہاں اگر آپس میں کوئی تلخ کلامی ہوجائے تو عدالت پہچ جاتے ہیں ہتک عزت کا دعویٰ کرنےلیکن ادھر برگزیدہ ترین ہستیوں کی ہتک پہ قانون کے حرکت میں آنے پر بھی واویلا مچاتے ہیں۔

آزادی اظہار اور انسانی حقوق وغیرہ ان کے پسندیدہ نعرے ہیں جو یہ اکثر و بیشتر زور و شور سے لگاتے ہیں جیسے سوات میں خاتون پر کوڑے برسانے کی متنازعہ وڈیو پر گلا پھاڑ پھاڑ کر یہ نعرے لگاتے ہیں۔ لیکن جرمنی کی شہیدہ حجاب مروہ الشربینی کہ جسے بھری عدالت میں چاقو کے 16 وار کر کے شہید کردیا گیا کے معاملے پر زبانیں گنگ ہوجاتی ہیں۔ لال مسجد کی طالبات جب طوائفوں کے اڈے کو بند کرنے کی کوشش کرتی ہیں تو اسلام آباد کی شاہراہ دستور پہ اپنے اس حق کے حصول کے لیے نعرے لگاتی ہیں کہ "میں ناچوں گی میں گائوں گی" لیکن ڈاکٹر عافیہ صدیقی کے اغوا، سات سال تک حراست کی اذیت اور پھر بغیر جرم ثابت ہوئے 76 سال کی سزا پر ان کے کان میں جوں تک نہیں رینگتی۔ ان   کے نزدیک کسی بازاری عورت کی عصمت جس کی کوئی عصمت ہی نہیں عافیہ صدیقی کے مقابلے میں معتبر ہے۔ بات جب لاپتہ افراد کی کی جائے یا گوانتہ ناموبے میں قید بے گناہوں کا ذکرجن پر کوئی قانون لاگو نہیں ہوتا تو انسانی حقوق اور قانون کی حکمرانی گدھے کے سر سے سینگ کی طرح غائب ہوجاتے ہیں۔

یہ ثقافتی وفود اور فنون لطیفہ کی سرگرمیوں کے لیے خوب مرے جاتے ہیں، اپنے لیے نہیں عوام کے لیے۔ وہ عوام جنہیں دو وقت کی روٹی میسر نہیں۔ ایک غریب مزدور جس کے دن کے بارہ سے سولہ گھنٹے محنت مزدوری میں گذرتے ہیں تاکہ وہ اپنے خاندان کا پیٹ بھر سکے۔ اب وہ بیچارہ کسی فیشن شو کا ٹکٹ خریدے یا اپنے بچوں کے لیے روٹی؟ ہاں اسی بہانے روشن خیالیوں کے مزے ہوجاتے ہیں۔ پتہ نہیں یہ کون سی ثقافتی اور فنون لطیفہ کی سرگرمیاں چاہتے ہیں؟ کوئی بھی چینل کھولیں اور جی بھر کر ان سرگرمیوں سے محظوظ ہوں۔ اس کے باوجود الزام ملا پر کہ ہمیں ٹھیک سے عیاشی نہیں کرنے دیتے۔

ابھی زیادہ دن نہیں گزرے جب  ان کے سابقہ قبلہ و کعبہ انجہانی سوویت یونین حیات تھے تو یہ ہمیں اس وقت بھی طرح طرح کے درس دیا کرتے تھے کہ عقل دنگ رہ جائے۔ اپنے آپ کو ترقی پسند اور دوسروں کو رجعت پسندکہتے پھرتے۔ یہ نام نہاد ترقی پسند شعرا اور ادیب جب کہیں اکھٹے ہوتے تو اپنے ہر اجلاس میں کو ئی نہ کوئی قرارداد منظور کرتے کہ فلاں کو رجعت پسند شاعر اور فلاں کو رجعت پسند ادیب قرار دیا جائے۔ ایک بار تو حد کردی ۔ قرارداد پیش کی گئی کی ڈاکٹر علامہ محمد اقبال کو رجعت پسند شاعر قرار دیا جائے۔ وہ تو گھر جل گیا میرا میرے گھر کے چراغ سے کے مصداق اندر سے کچھ کچھ شدت پسند فیض اور قاسمی صاحب وغیرہ ڈٹ گئے کہ ہمارے جیتے جی ایسا نہیں ہوسکتا۔ یہاں تیسری دنیا  کے ملکوںمیں آزادی اظہار، انسانی حقوق وغیرہ کی ٹھیکیداری انہی  روشن خیالیوں کے نام ہے ۔

کبھی کبھی تو ایسا لگتا ہے کہ ہمارے ارد گرد روشن خیالیوں کا جمعہ بازار لگا ہے۔ ایک سے بڑھ کر ایک، بھانت بھانت کی بولیاں، بھانت بھانت کے مشورے۔ عوام بیچاری سوچتی ہی رہ جاتی ہے کہ کیا کرے ہاں روشن خیالیوں کا بھلا ہوجاتا ہے۔ ڈالر اور پونڈ میں ادائیگی چلتی رہتی ہے۔