سفرنامہ انٹارکٹیکا

ہوائی جہاز انٹاڑکٹیکا کے بین القوامی ہوائی اڈے پر اترنے والا ہے، فضائی میزبان کے اس اعلان کے ساتھ ہی ہر طرف افراتفری پھیل گئی۔ جہاز کا عملہ جہاز میں رکھے سامان کی سیٹ بیلٹ باندھنے لگا کیونکہ مسافروں میں انٹارکٹیکا کی سیاحت کے لیے اس فلائیٹ سے صرف میں ہی سفر کررہا تھا۔ بہرحال جہاز بحفاظت برف سے بنے رن وے پر اترا تو ہم نے سکھ کا سانس اور خراماں خراماں ائرپورٹ کی عمارت کی طرف چل پڑے کیونکہ یہاں مسافروں کی سہولت کے لیے خاطر خواہ انتظامات نہیں ہیں۔

میں ہوائی اڈے سے متصل ایک ریسٹورنٹ میں بیٹھا اپنے آئندہ سفر کے لائحہ عمل پر سوچ رہا تھا کہ اچانک مجھے منفی 35 درجہ حرارت میں بھی شدید گرمی کا احساس ہوا۔ میں نے خوفزدہ نظروں سے ادھر ادھر نظر دوڑائی کہ کہیں حرارت ایمانی سے سرشار مرد مومن تو یہاں نہیں پہنچ گئے؟ لیکن یہ دیکھ کر اطمینا ن ہوا کہ نہیں انٹارکٹیکا ابھی ان کی دسترس سے باہر ہے ، معلوم ہوا کہ درجہ حرارت ریسٹورنٹ میں چلنے والے ہیٹر کی وجہ سے بڑھ گیا تھا۔ میں نے قریب سے گذرنے والے ویٹر کو بلایا اور اس سے ہیٹر کا تھرمواسٹیٹ کم کرنے کو کہا۔ لیکن میرے اشاروں کے باوجود وہ کچھ بھی نہ سمجھ پایا۔ میں نے مدد کے لیے ادھر ادھر دیکھا کہ کوئی اسے انٹارکٹیکائی زبان میں میرا مدعا سمجھا دے۔ اسی دوران میری نظریں ڈاکٹر ڈینگا سے چار ہوئیں۔ ڈاکٹر صاحب پینگوئن کی افزائش نسل اور فیمیل پینگوئن پر اس کے اثرات پر تحقیق کرنےکے لیے ہر سال موسم سرما میں یہاں آتے ہیں۔ وہ فورا میری مدد کو آگے بڑھے یوں منفی 35 درجہ حرارت میں بھی شدید گرمی سے جان چھوٹی۔

تھوڑی دیر بعد ہوائی اڈے کی عمارت سے باہر نکل کرمیں سڑک کے کنارے کھڑا ٹیکسی کا انتظار کرنے لگا۔ برف سے بنی شیشے کی طرح چکمدار سڑک تھی ہر طرح کے داغ دھبوں کے بغیر۔میں نے دل ہی دل میں یو۔ این۔ او کا شکریہ ادا کیا جو ان جاہل اور اجڈ پاکستانیوں کو یہاں کا ویزہ نہیں دیتے ورنہ یہ سڑک بھی پان کے پیکوں سے رنگین ہوتی یا پھر خون سے۔ آس پاس نظر دوڑانے سے معلوم ہوا کہ ہر چیز کو برف کی انتہائی دبیز تہہ سے ڈھانپ کر پردے کا اہتمام کیا گیا ہے۔ بہت افسوس ہوا کہ دائیں بازو سے تعلق رکھنے والے رجعت پسندانہ نظریات یہاں بھی پہنچ گئے تھے۔ بہت دیر گذرنے کے باوجود بھی جب کوئ ٹیکسی نہیں آئی تو میں دوبارہ ہوائی اڈے کی عمارت میں گیا ، پوچھنے پر پتہ چلا کہ یہاں کوئی ٹیکسی سروس نہیں ہے۔ مجبورابرفیلی گاڑی [آئس ویہیکل] کرائے پر حاصل کی ،اپنا قطب نما نکالا اور پھر جنوب مشرق کی سمت 250 کلومیٹر کا فاصلہ طے کرنے کے لیے برفیلی گاڑی کے انگیشن میں چابی گھمادی۔۔۔

.
بقیہ اگلے شمارے میں۔۔۔
نوٹ: یہ سفر نامہ ٹائم میگزین کے ان وزیبل شمارے میں شائع ہوا۔۔۔